فيفي عبده: عملت 37 عمرة وحجيت 5 مرات ومش خايفة من الموت وبدعي ربنا أعيش 100 سنة

تحدثت الفنانة فيفي عبده عن فكرة الموت مؤكدة أنها لا تخاف منه، لكنها في نفس الوقت تتمنى وتدعوا الله في كل صلاة أن يمد في عمرها وتعيش لـ100 عام.

وقالت فيفي عبده خلال لقائها في برنامج "عندي سؤال" من تقديم محمد قيس عبر قناة "المشهد": "مش خايفة من الموت وشفت تربتي وموضباها لكن نفسي ربنا يديني عمر شوية لأني لسه معشتوش، كل ما أركع وأصلي أقوله يارب إديني شوية عمر عايزة أعيش أكتر من كده عايزة أعيش 100 سنة مثلا".

فيفي عبده وليلى عبداللطيف

وتابعت فيفي عبده لتحكي عن موقف جمعها بخبيرة الأبراج ليلى عبد اللطيف: "ليلى عبد اللطيف قالت إني هعيش لـ80 سنة قابلتها في الطيارة قلت لها مش عاجبني الـ80 دول هل من مزيد؟ خافت مني قالتلي خلاص 90، العمر بإيد ربنا، نفسي أعيش 100 سنة أشوف اللي بحبهم أشوف وأعيش مع أحفادي".

وأوضحت فيفي عبده أنها لا تخاف أو تفكر كيف ستواجه الله سبحانه وتعالى قائلة: "مواجهة ربنا أنا مطمنة طول عمري ماشية بما يرضي الله مظلمتش حد بساعد الغلبان أنا غلبانة زيهم، إنسانة واضحة كل دي حاجات تخليك تبقى مطمن في الحياة، لكن ربنا هيعمل فيا إيه أنا راضية بكل حاجة، ربنا يهديني لو جاتلي الهداية هقولها إيه لأ كخة".

وخلال اللقاء رفضت فيفي عبده من يصف الرقص أنه حرام قائلة: "الرقص حرام ليه؟ هو مش شغل زي أي حاجة الباليه حرام؟ في حاجات كتير حرام، الرقص دا شغل زي أي شغل ليه احترامه وليه ناسه اللي بيتفرجوا عليه وليه اللي بيقدروه ويحترموه".

فيفي عبده والحجاب

وعن فكرة ارتدائها الحجاب قالت فيفي عبده: "أنا متحجبة طول الوقت، الكلام دا يتقال للناس الفالته أنا بعتبر إني محجبة لأني مش بعمل حاجة غلط ومش بجيب في سيرة الناس محجبة في لساني وفي كل تصرفاتي، مطلوب مني إيه أكتر من كده وإذا كان على الشغل لو ربنا قالي في أي وقت إلبسي الحجاب هلبسه".

يذكر أن آخر أعمال فيفي عبده الفنية كان مسلسل "شغل في العالي" الذي عرض عام 2022، بطولة فيفي عبده وشيرين رضا ومروان يونس، بجانب عدد من ضيوف الشرف من بينهم بيومي فؤاد، ونضال الشافعي، ونجم كرة القدم ميدو، والعمل من إخراج مرقس عادل، وتأليف حسين مصطفى محرم.